Шишаи бишкастаам

Зан мавҷудест, ки вуҷудаш саршор аз муҳаббат, меҳр, каромат, шарофат ва латофатест, ки барои ҳар ҳастии сайёра чун сутуни устувор бори зиндагиро таҳаммул менамояд. Ин мавҷуди олам дорои сиришту сармояест,ки ҳар ҳар лаҳза инсониятро ба сӯи такомули ҳаёт ҳидоят менамояд. Ӯ чун фариштаест, ки боли пурмеҳру нозашро барои башарият мекушояд. Аз ҳамин хотир аст, ки меҳри бепоён ва зебоиву навозишҳояш мо инсонҳоро ба муҳаббати оламу одам ошно месозад. Мо мардҳо дар канори ҳамин фариштаи замин бо олами рангинмоя ба воя мерасему аз вай дарси меҳру латофат, садоқату инсондӯстиро меомўзем.

Вале баъзеҳо мутаассифона ҳанӯз ҳам амалҳои зӯроварӣ дар оиларо нисбати зан пеша карда, ҳурмату манзалати занро ба ҷо намегузоранд. Занро зери ҳаргуна дашном, таҳқир ва дар баъзан ҳолатҳо зери мушту лагат мегиранд. Қиссаи навбатии мо низ аз ҳаёти як модаре, ки соҳиби се фарзанд асту то ҳол зери зулми шавҳар қарор дорад...

Махатма Ганди

"Ғалабае, ки бо зӯроварӣ ба даст оварда шудааст, баробари мағлубият аст, зеро он умри кӯтоҳ дорад."

НОМҲОИ ҚАҲРАМОНОН БАРОИ ИФШО НАШУДАНИ ШАХСИЯТАШОН ИВАЗ КАРДА ШУДААСТ.

Лоиҳаи "Озодӣ - дар қафас"

Ба мо Мамлакатбону аз лоиҳаи “Озоди дар қафас” хабар ёфта тариқи телефон тамос гирифтанд. Он кас бисёр хостанд оиди саргузашти худ қисса намоянд. Мамлакатбону модари се фарзанд буда, онҳо дар як деҳаи дурдасти ноҳияи Деваштич зиндагӣ мекунанд. Ба гуфти Мамлакатбону зану шавҳар хешу табор буда, 17 сол аст бо ҳам зиндагӣ мекунанд. Аз оғози барпо кардани оила Мамлакатбону мегӯяд, ки шавҳараш ба ӯ муносибати тунд дорад. Ҳатто бади тавлиди фарзанди аввалҳам шавҳараш аз Мамлакатбону норизо буд. Сабаби асосии ин бадбиниҳои шавҳар, бо хоҳиши волидон барпо кардани оила мебошад.

Мамлакатбону гуфт, ки “ шавҳарам чӯпонӣ мекунанд. Ҳар фасли баҳор то тирамоҳ моли мардумро чаронда зиндагиро таъмин мекунанд. Аз кишти замин бошад фоидаашро барои рӯзғор ва агар даромад хуб шавад боз гусфанд ё буз мехаранд. “...

Ба гуфти Мамлакатбону шавҳараш баъди тавлиди фарзанди дуюмашон ба муҳоҷират рафта буд. Дар ҳақиқат ба чӯпонии шавҳараш ва дӯзандагии Мамлакатбону зиндагиашон пеш намерафт. Чун мегӯяд шавҳараш одати нӯшидан надошт, вале аз Россия баргашту одати нӯшиданро пайдо кард.

Мамлакатбону мегӯяд, ки шавҳараш бо ҳамсояашон қариб, ки ҳар шом ба бозиҳои қиморӣ (билярд) рафтаву аз онҷо нӯшида меомад. Ҳатто вақтҳои охир маблағҳои кор карда омадаашро ба қимор сарф карда мағлуб мешуд. Ба гуфти Мамлакатбону ин одат яку якбора рафтори шавҳарашро куллан дигар кард. Баъзан ҳамсояҳо шавҳарашро дар ҳолати мастӣ кӯталкунон меоварданд.

“

" Нафрат - ин пешгӯи зӯроварӣ аст. "

— Гуцериев Михаил Сафарбекович

Мамлакатбону гуфт: “ Шавҳарам қиморӣ шуд. Борҳо ман маблағҳоро пинҳон мекардам, аммо шавҳарам маро латукӯб карда, талаб мекард маблағ диҳам. Боре ман ба бародари калонии шавҳарам муроҷиат кардам. Ҳама вазъиятро гуфтам, то ки шавҳарамро аз ин роҳ гардонанд. Зеро фарзандон ба воя расидаистодаанд, ба онҳо маблағ барои таҳсил ва оянда барои тӯй лозим аст. Шавҳарам боре маст омада маро дар назди фарзандон чунон латукӯб карданд, ки ман ду ҳафта ба худ наомадам. Сабабашро пурсон шавам дар ҷавоб гуфтанд “ Ту ба ман тамоман кор нагир. Агар нахоҳӣ баро рав! Ту аз фарзандон хавотир нашав, то ки ман ҳастам инҳо хору зор намешаванд. Ту зани нодон баро рав! “...

Умуман занро озор додан, ё задан ин дуруст нест. Бигзор вай оилааш бошад, ё дигар зан бошад. Латукӯб кардани инсонро шариат маҳкум мекунад.

Ҳоҷи Ҳусайн Мӯсозода

Раиси Шӯрои Уламои дин дар вилояти Суғд

Мусоҳиба

Латукӯби занро аз нигоҳи шариат шарҳ диҳед.

Мамлакатбону мегӯяд, ки шавҳараш ӯро чашми дид надорад. Аз байн боз ду-се сол гузашту шавҳараш боз ба муҳоҷират рафта омад. Ба гуфти бобову бибиҳо “ Ҳоло ҳам ҳаму Аҳмади порина “...

Аз шавҳараш ягон дигаргуни надид. “ Шавҳарам бо сабаби коронавирус ба муҳоҷират дигарбора рафта натонистанд. Намедонам чи кор кунам. Ман ҳаминро гуфтани ҳастам, ки то ба кай зиндагӣ инхел идома меёбад. Ман аз тақдири худам не, балки аз тақдири се фарзандам нигаронам. Охир ман тобу тоқати мушти зӯри шавҳарро дигар надорам. Борҳо муроҷиат кардам, то ки кормандони ҷамоат бифаҳмонанд. Аммо маро бо ҷудошавӣ таҳдид мекунад. Охир зиндагӣ бозича нест. Ҷудо шудан мушкили нест барои ман! Лекин фарзандон чӣ? Ман наметавонам ба суд ё кормандони ҳифзи ҳуқуқ муроҷиат кунам. Чунки рафту мабодо ҳукми судӣ диҳанду шавҳарамро ҳабс кунанд. Ҳаёти фарзандонам номи неки онҳо бад мешавад.“Дилам мисоли шишае бишкастааст, ки намешавад онро пайванд кард“.

Муроҷиати ман ба бонувон, духтароне, ки ҳоло оиладор нашудаанд ҳамин аст, ки “ Дар интихоби шавҳар, дар бунёди оила саросема нашавед. Ҳатто илоҷе ёфтед ба волидони худ фаҳмонед, ки бунёди оила сар-сариву кӯр-кӯрона намешавад.

Ман умед дорам, ки оянда шавҳарам маро мефаҳманд. Ман тамоми кӯшишамро барои фарзандонам барои ояндаи неки онҳо сарф мекунам. Аммо ҳаминро гуфтани ҳастам "ман қурбони зулму беадолатиҳои зиёди шавҳарам гаштаам"...

Барои пеши роҳи зӯровариро гирифтан мо бояд ҷавононро ба ҳаёти оилавӣ омода кунем

Лоиҳаи " Озодӣ - дар қафас "

“Маводи мазкур бо дастгирии Иттиҳоди Аврупо таҳия шудааст.

Масъулияти муҳтавои он ба зиммаи ҶДММ ШТРР "Тирози Ҷавонӣ" вогузор шуда, мавқеи Иттиҳоди Аврупоро инъикос намекунад”